مشیر اطلاعات خیبرپختونخوا بیرسٹر محمد علی سیف نے کہا ہے کہ الیکشن ایکٹ ترمیمی آرڈیننس فارم 47 حکومت کو تحفظ دینے کے لیے ہے۔
الیکشن ترمیمی آرڈیننس پر بیرسٹر محمد علی سیف نے ردعمل میں کہا کہ پہلے الیکشن کمیشن کے ساتھ مل کر فارم 47 کے ذریعے جعلی حکومت بنائی، اب ریٹائرڈ ججز کو الیکشن ٹربیونلز میں شامل کرنے کے لیے آرڈیننس جاری کیا گیا۔
انہوں نے کہا کہ حاضر سروس ججز کے بجائے ریٹائرڈ ججز شامل کرنے کا کوئی تُک نہیں بنتا، اس کالے قانون کے آرڈیننس کو یکسر مسترد کرتے ہیں۔
بیرسٹر سیف نے یہ بھی کہا ہے کہ خیبرپختونخوا اسمبلی نے بھی آرڈیننس کے خلاف قرارداد منظور کی ہے۔
واضح رہے کہ قائم مقام صدر یوسف رضا گیلانی نے 2 آرڈیننس جاری کیے ہیں جن میں سے ایک الیکشن ایکٹ ترمیمی آرڈیننس ہے۔
الیکشن ایکٹ ترمیمی آرڈیننس کے مطابق الیکشن ٹربیونل میں حاضر سروس جج کے علاوہ ریٹائرڈ جج بھی ہوں گے۔
