(24نیوز) اسلام آباد کی انسداد دہشت گردی عدالت کے جج طاہر عباس سپرا نے پارلیمنٹ ہاؤس سے گرفتار پی ٹی آئی کے اراکین اسمبلی شیر افضل مروت، شیخ وقاص اکرم اور احمد چٹھہ کی درخواست ضمانت سننے سے معذرت کر لی۔
تفصیلات کے مطابق شیر افضل مروت، شعیب شاہین، شیخ وقاص اکرم، زین قریشی اور دیگر کی درخواست ضمانت پر سماعت انسداد دہشتگردی عدالت کے ڈیوٹی جج طاہرعباس سپرا کی عدالت میں ہوئی جس میں ڈیوٹی جج طاہر عباس سپرا نے کہا کہ پراسیکیوٹر راجا نوید نہیں آئے اس لیے سماعت ایک دن بعد ہو جائے گی ، وکیل صفائی کا کہنا تھا ایم این ایز سب جیل میں ہیں لیکن شعیب شاہین اور دیگر ورکرز تو جیل میں ہیں، مقدمے میں پولیس اہلکار کو مارنے کا ذکر ہے مگر ساتھ میڈیکل سرٹیفکیٹ موجود نہیں ہے، شعیب شاہین پر پستول رکھنے کا الزام ہے مگر برآمدگی ایک ڈنڈے کی ہوئی ہے۔
جج طاہر عباس سِپرا نے استفسار کیا کہ ڈنڈے کی ریکوری کہاں لکھی ہوئی ہے؟ جس پر وکیل صفائی نے کہا کہ گزشتہ روز اسلام آباد ہائیکورٹ میں تفتیشی افسر نے بتایا کہ شعیب شاہین سے ڈنڈا ملا ، انسداد دہشتگردی عدالت کے جج نے کہا کہ ڈیوٹی جج صرف ارجنٹ نوعیت کا ہی مقدمہ سن سکتا ہے، کوشش ہوگی شعیب شاہین کی درخواست ضمانت پر آج ہی فیصلہ کروں، شعیب شاہین کے بارے میں کہا گیا بٹیر نہیں پکڑ سکتے، پھر پستول کا الزام ڈال دیا گیا ۔ ڈیوٹی جج طاہرعباس سپرا کے ریمارکس پر عدالت میں قہقہے لگ گئے۔
عدالت کی جانب سے شعیب شاہین کی درخواست ضمانت پر دلائل کے لیے پراسیکیوٹر کو طلب کرلیا اور وکیل صفائی سے کہا “تسی سارے جا کے چا شا پیو” ۔
جج طاہر عباس سِپرا نے شیر افضل، شیخ وقاص اور احمد چٹھہ کی درخواست ضمانت پر سماعت سے معذرت کرلی اور کہا کہ شعیب شاہین کی حد تک درخواست ضمانت پر کوشش کرتا ہوں کہ آج فیصلہ کر دوں، جج طاہر عباس سپرا نے شیر افضل مروت، شیخ وقاص اکرم اور احمد چٹھہ کا گھر ویسے ہی سب جیل قرار دیا جبکہ بعدازاں شیر افضل مروت، شیخ وقاص اکرم اور احمد چٹھہ کی درخواست ضمانت پر سماعت پیر تک ملتوی کر دی گئی ہے۔
