پاکستان کی ٹیسٹ کرکٹ ٹیم کے سابق کپتان یونس خان نے کہا ہے کہ یہ امر خوش آئند ہے کہ چیمپینز ٹرافی 2025 پاکستان میں منعقد ہو رہی ہے، چیمپینز ٹرافی کے معاملے پر پی سی بی کا کردار شاندار رہا ہے، کمیونٹی کی سطح پر ہونے والے کرکٹ مقابلوں سے بورڈ کو گھبرانے کی ضرورت نہیں ہے۔
اصغر علی شاہ کرکٹ اسٹیڈیم پر میڈیا سے گفتگو کرتے ہوئے یونس خان نے کہا کہ پاکستان کی میزبانی میں چیمپینز ٹرافی کا انعقاد خوش آئند ہے، ٹرافی کے معاملے میں پاکستان کرکٹ بورڈ کا کردار قابل رشک رہا،پی سی بی نے اپنے موقف پر شاندار انداز میں اسمارٹ طریقے سے کھیلا۔
ان کا کہنا تھا کہ میں پاکستان کو فائنل فور میں کھیلتا دیکھ رہا ہوں، خواہش ہے کہ پاک بھارت کرکٹ مستقل بنیادوں پر ہو، بھارت کے خلاف کھیل کر اچھے کھلاڑی سامنے آتے ہیں، فخر زمان کو پاکستان کرکٹ ٹیم کا حصہ ہونا چاہیے۔
یونس خان نے کہا کہ مجھے لگتا ہے کہ پاکستان چیمئنز ٹرافی کے سیمی فائنل میں جگہ بنانے میں کامیاب ہو جائے گا، میں چاہتا ہوں کہ پاکستان اور بھارت کے درمیان مستقل بنیادوں پر کرکٹ مقابلوں کا انعقاد ہو۔
ان کا کہنا تھا کہ میں نے ہمیشہ پاک بھارت کرکٹ کی بات کی ہے، بھارت کے خلاف کھیل کر اپ اچھے اور بڑے پلیئر بنتے ہیں،جب آپ بڑی ٹیموں سے کھیلتے ہیں تو فائدہ ہوتا ہے۔
سابق کپتان نے کہا کہ کھلاڑی کا اپنے ہوم گراؤنڈ پر کھیلنا سود مند فائدہ ہوتا ہے، ہم نے نو برس پاکستان سے باہر کرکٹ کھیلی، اسد شفیق اور ازظہرعلی ان کھلاڑیوں میں شامل ہیں جنہوں نے زیادہ تر بیرون ملک کرکٹ کھیلی۔
یونس خان نے سینئر بیٹر فخر زمان کے حوالے سے سوال کے جواب میں کہا کہ فخر زمان ایک اچھے کھلاڑی ہیں اور ان کو پاکستان کرکٹ ٹیم میں ضرور شامل ہونا چاہیے، ٹیم کے لیے اچھی کارکر کے دکھانے والے کھلاڑیوں کو سپورٹ کرنا چاہیے۔
ان کا کہنا تھا کہ بطور اوپنر وہ صائم ایوب کے ساتھ اچھا اغاز فراہم کر سکتے ہیں، اس ابتدائی جوڑی کی بدولت پاکستان ون ڈے کرکٹ میں 400 رنز تک کی اننگز کھیل سکتا ہے، ان دونوں کھلاڑیوں کو بطور اوپنر ہی ٹیم کا حصہ ہونا چاہیے، ان کو نچلے نمبر پر کھلانا مناسب نہیں رہے گا۔
فاسٹ بولر شاہین شاہ آفریدی کے حوالے سے پوچھے جانے والے سوال کے جواب میں یونس خان نے کہا کہ شاہین آفریدی بہترین کارکردگی کا مظاہرہ کر رہے ہیں اور اس وقت وہ شاہینوں کی طرح بلندیوں پر پرواز کر رہے ہیں۔
ایک اور سوال کے جواب میں یونس خان نے کہا کہ فرنچائز کرکٹ سے کرکٹ بورڈ کو بہت مدد اور معاونت ملتی ہے، کمیونٹی کی سطح پر ہونے والے کرکٹ مقابلوں سے پی سی بی کو گھبرانے کی ضرورت نہیں ہے، آج کے دور میں مقامی سطح پر کرکٹ ٹورنامنٹ کا انعقاد کرانا اسان کام نہیں۔
