گرما گرم بھاپ اڑاتا کافی کا کپ انسانی صحت کے لئے انتہائی نقصان دہ بھی ہوسکتا ہے کیونکہ درحقیقت کیفین والے مشروبات کا استعمال خطرناک مرض کا سبب بن سکتا ہے۔
اس حوالے سے امریکن جرنل آف میڈیسن میں شائع ہونے والی ایک رپورٹ کے مطابق روزانہ کافی کے تین کپ یا اس سے زائد پینے سے مائیگرین (آدھے سر کا درد) ہونے کا خدشہ بڑھ جاتا ہے۔
تحقیق کے مطابق جو مریض ایپیسوڈیک مائیگرین کے شکار ہیں اگر وہ ایک یا دو سے زائد کافی مشروبات پیتے ہیں انہیں سر درد کی شکایت رہتی ہے لیکن اگر وہ تین یا اس سے زائد کافی پیتے ہیں تو انہیں آنے والے دنوں میں مائیگرین کا خدشہ ہوتا ہے۔
ہارورڈ یونیورسٹی کے ایلیز ابیتھ موسٹوفسکی نے کہا کہ مائیگرین کے علاوہ نیند میں کمی آجاتی ہے جو مائیگرین کے خطرے کو بڑھا سکتی ہے۔
کیفین کا تاثیری عمل پیچیدہ ہے کیونکہ جہاں یہ نقصان کرتی ہے وہیں اس کے برعکس اس کو قابو کرنے میں بھی مدد کرتی ہے۔
علاوہ ازیں مندرجہ بالا سطور میں جہاں زائد کافی پینے کا نقصان بیان کیا گیا ہے وہیں اس بات سے بھی انکار نہیں کیا جاسکتا کہ کافی کی معتدل مقدار کے بہت سے طبی فوائد ہیں جو وزن کم کرنے سے لے کر سر درد، فالج، ذیابیطس اور دیگر بیماریوں سے بچانے میں بھی مدد کرتے ہیں۔
کافی کے سب سے بڑے فوائد میں سے ایک یہ ہے کہ یہ اینٹی آکسائیڈنٹس سے بھرپور ہے، جو آپ کے جسم اور خلیات کو بہتر طریقے سے کام کرنے ، بیماری کی روک تھام اور عام طور پر اچھی صحت کو برقرار رکھنے میں مدد دیتا ہے۔
