بھارتی ٹیلی ویژن کی مایہ ناز اداکارہ حنا خان کینسر میں مبتلا ہیں اور ان کی کیمو تھراپی آخر مراحل میں داخل ہوگئی ہے۔
اداکارہ نے کینسر سے مقابلہ کرنے کے اس سفر میں ہمت و حوصلہ بننے والے ایک بال سے اپنے مداحوں کو ملوایا۔ انسٹاگرام پر حنا خان نے اپنی مختلف تصاویر شیئر کیں اور بتایا کہ موذی مرض کینسر کے خلاف کیمو تھراپی بس اب آخری مراحلے میں داخل ہونے والی ہے۔
اداکارہ نے اپنی آنکھوں کی تصاویر شیئر کی ہیں، کیمو تھراپی کی وجہ سے پلکیں اب جھڑ چکی ہیں، اس کے ساتھ ہی انہوں اپنی پوسٹ میں جذباتی کیپشن بھی تحریر کیا۔
انہوں نےلکھا ہے کیا آپ جاننا چاہتے ہیں کہ اس مشکل وقت میں مجھے ہمت و حوصلہ کس چیز سے مل رہا ہے؟ اس ایک پلک سے جو کسی زمانے میں میری آنکھوں کی خوبصورتی کو بڑھانے والی ایک طاقتور اور خوبصورت بریگیڈ، میری پلکوں کا حصہ تھی۔
اداکارہ نے اس سخت و مشکل طریقۂ علاج کے دوران پلکوں کے بچ جانے والے آخری بال کو بہادر اور جنگجو قرار دیتے ہوئے مزید لکھا کہ میں اپنی کیمو تھراپی کے آخری سائیکل کے قریب ہوں، یہ ایک پلک میری ہمت کا ذریعہ ہے، یہ میرے ساتھ اس بیماری کا مقابلہ کر رہا ہے، ہم یہ سب دیکھ رہے ہیں اور آگے بھی دیکھیں گے، ان شاء اللّٰہ۔
حنا خان نے مزید بتایاکہ ایک دہائی سے کبھی نقلی پلکوں کا استعمال نہیں کیا لیکن اب شوٹس کے لیے کرنا پڑے گا۔
اس کے ساتھ ہی انہوں نے ایک بار پھر اپنی ہمت خود ہی بندھاتے ہوئے یہ بھی لکھا ہے کہ کوئی نہیں، سب ٹھیک ہو جائے گا۔
