یوٹیوب نے صارفین کی سہولت کے لیے نیا فیچر “پلے سمتھنگ” متعارف کرایا ہے، جس کے استعمال سے صارف کو اگلی ویڈیو تلاش کرنے میں آسانی ہوگی۔
گوگل کی ملکیت ویڈیو اسٹریمنگ پلیٹ فارم یوٹیوب نے ایک نیا آپشن متعارف کرایا ہے جو ان صارفین کے لیے کارآمد ہے جو اپنی اگلی ویڈیو کے انتخاب میں غیر یقینی کا شکار ہوتے ہیں۔
یہ فیچر، جسے “کچھ چلائیں” (پلے سمتھنگ) کے طور پر جانا جاتا ہے، ایک ایسا بٹن (فلوٹنگ ایکشن بٹن ) ہے جو یوٹیوب پر ویڈیوز چلاتا ہے۔
یہ بات قابلِ ذکر ہے کہ یہ فیچر پچھلے ایک سال سے آزمائش کے مرحلے میں تھا اور فی الحال اینڈرائیڈ صارفین کے لیے ورژن 19.5 پر دستیاب ہے۔
یہ بٹن کیسے کام کرتا ہے؟
یہ بٹن ہوم ٹیب کے اوپر سیاہ پس منظر میں ہوتا ہے۔ صارف اس بٹن کو منتخب کرکے بغیر اسکرول یا تلاش کیے براہ راست کسی ویڈیو سے لطف اندوز ہو سکتا ہے۔
جیسے ہی بٹن پر کلک کریں، یہ فیچر شارٹس پلیئر کے ذریعے ویڈیو چلانا شروع کر دیتا ہے۔
یہ بھی جان لینا ضروری ہے کہ یہ فیچر صرف شارٹس تک محدود نہیں ہے، یہ پورٹریٹ موڈ میں معیاری ویڈیوز بھی چلا سکتا ہے۔
ویڈیو کنٹرولز کو سادہ بنایا گیا ہے، لائک، ڈس لائک، کمنٹ اور شیئر کے بڑے بٹن دائیں جانب دیے گئے ہیں۔ نیچے موجود ٹائم لائن اسکربر استعمال میں آسان ہے۔ تاہم اگر ملٹی پلیئر آپشن فعال ہو تو “پلے سمتھنگ” بٹن غائب ہو جائے گا۔
یہ فیچر صارفین کی ویڈیوز دیکھنے کی عادات پر مبنی متعلقہ مواد کو خود بخود منتخب کرتا ہے، جس سے انہیں تلاش کے عمل کی ضرورت نہیں رہتی۔
یوٹیوب کے اس اقدام کا مقصد صارف کے تجربے کو بہتر بنانا اور زیادہ بے ساختہ مواد دیکھنے کی حوصلہ افزائی کرنا ہے۔
یہ فیچر وسیع پیمانے پر دستیاب ہو چکا ہے اور توقع کی جا رہی ہے کہ آئندہ چند ماہ میں عوامی سطح پر لانچ ہو جائے گا۔
یوٹیوب نے حال ہی میں کئی نئی خصوصیات متعارف کرائی ہیں، جن میں عمودی اسکرول کا اشارہ (Vertical Scroll Gesture) اور اے آئی پر مبنی خودکار ڈبنگ (آٹو ڈبنگ) شامل ہیں۔ رپورٹوں کے مطابق مزید فیچرز بھی جلد ہی متعارف کیے جائیں گے۔
