بالی ووڈ کے بادشاہ شاہ رخ خان نے 2021 میں اپنے بیٹے آریان خان کی گرفتاری کے بعد میڈیا سے دوری اختیار کر لی تھی۔ آریان کو بعد میں تمام الزامات سے بری کر دیا گیا، لیکن اس واقعے نے شاہ رخ کو گہرائی سے متاثر کیا۔
ایک حالیہ انٹرویو میں معروف پاپرازی ورندر چاؤلہ نے انکشاف کیا کہ شاہ رخ خان نے ایک بار انہیں ذاتی تصاویر ڈیلیٹ کرنے پر فون کر کے شکریہ ادا کیا اور بتایا کہ وہ میڈیا سے دور کیوں رہے۔
ورندر نے بتایا کہ 2022-2023 کے دوران، شاہ رخ خان اور ان کے خاندان کی کچھ ذاتی تصاویر لی گئیں۔ یہ دیکھتے ہی ورندر نے اپنے فوٹوگرافرز کو ڈانٹا اور تصاویر ڈیلیٹ کر دیں۔ انہوں نے فوراً شاہ رخ کی ٹیم کو اطلاع دی کہ کوئی مواد لیک نہیں ہوگا۔ بعد میں شاہ رخ خان کے مینجر نے ورندر کو کال کر کے کہا کہ ’سر‘ آپ سے بات کرنا چاہتے ہیں۔
ورندر نے بتایا: “شاہ رخ خان نے مجھ سے فون پر بات کی اور کہا: ’بیٹا، انہوں نے مجھے بتایا کہ آپ نے ویڈیو ڈیلیٹ کر دی۔ میں میڈیا سے دور نہیں رہنا چاہتا لیکن میں بھی ایک باپ ہوں، جو کچھ غلط ہوا، اس نے مجھے بہت تکلیف دی۔”
انہوں نے مزید کہا: “اس گفتگو کے دوران میں نے محسوس کیا کہ شاہ رخ خان ایک باپ کے طور پر کتنے دکھی تھے۔ اس واقعے کے بعد، میں نے خود کو ان کے جذبات کے ساتھ جوڑا۔”اس واقعے کے بعد، شاہ رخ نے میڈیا میں اپنی موجودگی کو محدود کر دیا، لیکن پھر بھی کبھی کبھار تقریبات میں نظر آتے ہیں۔ ان کی اگلی فلم کنگ جلد ریلیز ہونے والی ہے، جس میں ان کی بیٹی سہانا خان اور ابھیشیک بچن بھی شامل ہیں۔
