لاہور (ڈیلی پاکستان آن لائن )بینک آف پنجاب کے صدر ظفر مسعود پاکستان بینکس ایسوسی ایشن (پی بی اے) کے چیئرمین منتخب ہوگئے۔
نجی ٹی وی جیو نیوز نے پاکستان بینکس ایسوسی ایشن کی جانب سے جاری کردہ اعلامیے کے حوالے سے بتایا کہ محمد اورنگزیب کے وفاقی وزیر بننے پر چیئرمین پی بی اے کا عہدہ خالی ہوا تھا، ایگزیکٹو کمیٹی کے اجلاس میں متفقہ طور پر ظفرمسعود کو چیئرمین منتخب کیا گیا۔ظفر مسعود اب تک سینئر وائس چیئرمین پاکستان بینکس ایسوسی ایشن خدمات انجام دے رہے تھے، صدر فیصل بینک یوسف حسین سینئر کو وائس چیئرمین پی بی اے مقرر کیا گیا ہے۔ایم ڈی سٹی بینک پاکستان احمد خان بوزئی وائس چیئرمین پی بی اے مقرر ہو گئے ہیں۔
جاری کردہ اعلامیے میں کہا گیا کہ پی بی اے کو یقین ہے کہ نئی قیادت مو¿ثر انداز سے اپنا کام جاری رکھے گی، پی بی اے سٹیٹ بینک سمیت اہم سٹیک ہولڈرز سے بینکوں کے روابط بنائے رکھے گی۔پی بی اے کے اعلامیے میں کہا گیا کہ نئی قیادت ٹیکنالوجی،کمپلائنس اور مالی شمولیت بڑھانا جاری رکھے گی، نئی قیادت ایس ایم ایز اورپاکستان کے لئے اہم منصوبوں کی فنانسنگ پر توجہ دےگی۔
اعلامیے میں کہا گیا کہ پی بی اے محمد اورنگزیب کی بطورچیئرمین کاوشوں کا اعتراف کرتی ہے۔
