اسلام آباد (ڈیلی پاکستان آن لائن)اسلام آباد میں فروٹ کی ریڑھی لگانے والی خاتون کا بچہ اغوا کرنے کے ملزمان کو گرفتار کر لیا گیا۔
پولیس کے مطابق خاتون تھانہ کوہسار کے علاقہ ایف سکس میں فروٹ کی ریڑھی لگاتی ہے۔ خاتون کے ساتھ اس کا 7 ماہ کا بچہ بھی ہوتا ہے، جسے 31 اگست کو گاڑی میں سوار ملزمان نے اغوا کرلیا۔
پولیس ترجمان نے کہا کہ آئی جی اسلام آباد نے اس واقعے کا نوٹس لیکر بچے کی فوری بازیابی کے احکامات دیے۔ڈی آئی جی مصطفیٰ تنویر کی زیرنگرانی آرڈی یو کی 10 ٹیمیں بنائی گئیں، پولیس ٹیموں نے تمام وسائل استعمال کرتے ہوئے بچے کو بازیاب کرلیا اور اغوا میں ملوث خاتون سمیت 2 ملزمان کو گرفتار کرلیا گیا۔
ترجمان کے مطابق ملزمان کے قبضے سے واردات میں استعمال ہونے والی گاڑی بھی برآمد کرلی گئی۔ بچے کو قانونی کارروائی کے بعد والدہ کے حوالے کر دیا گیا۔ ڈی آئی جی ڈاکٹر سید مصطفیٰ تنویر نے بچے کی والدہ سے ملاقات کی، بچے کی والدہ نے اسلام آباد پولیس کا شکریہ ادا کیا۔
