اسلام آباد (فاروق اقدس) امریکا میں پاکستان کے سفیر رضوان سعید شیخ نے صدر جو بائیڈن کو اپنی سفارتی اسناد پیش کر دیں، اس موقع پر امریکی صدر جوبائیڈن نے کہا ہے کہ علاقائی سلامتی اور استحکام کیلئے پاکستان اور امریکا کے تعلقات اہم ہیں، عالمی اور علاقائی چیلنجز سے نمٹنے کے لیے امریکا پاکستان کے ساتھ ہے۔ امریکی صدر نے دہشتگردی کے خطرات سے نمٹنے پر پاک امریکا تعاون کو سراہا، پاکستانی سفیر رضوان سعید شیخ کا کہنا تھا پاک امریکا اقتصادی شراکت داری ہماری ترجیح ہے، پاکستان متبادل توانائی،گرین ٹیکنالوجی اور دیگر شعبوں میں امریکی سرمایہ کاری کے لیے تیار ہے۔ قبل ازیں امریکا میں پاکستانی سفیر رضوان سعید شیخ نے اراکین کانگریس ٹم سوازی اور جیک برگمین سے بھی ملاقات کی تھی جس میں دو طرفہ تعلقات اور سرمایہ کاری کو بڑھانے سمیت مختلف امور پر تبادلہ خیال کیا گیا۔
