سندھ ہائی کورٹ نے ایم کیوایم کے کارکن سمیت دیگر لاپتہ شہریوں کی بازیابی کے لیے جے آئی ٹیز اور صوبائی ٹاسک فورس کا اجلاس بلانے کا حکم دے دیا۔
دورانِ سماعت تفتیشی افسر نے عدالت کو آگاہ کیا کہ شہری قاضی اعجاز الدین سرجانی ٹاؤن سے لاپتہ ہیں، ان کی اہلیہ نے بتایا ہے کہ ان کا شوہر ایم کیو ایم کا رکن بھی تھا۔
تفتیشی افسر نے مزید بتایا کہ معلوم ہوا ہے کہ وہ اسٹیٹ ایجنسی کا کام بھی کرتا تھا، شہری کے دوستوں سے یہ بھی پتہ چلا ہے کہ اس نے کافی قرضے لیے ہوئے تھے جس کی وجہ سے وہ خود لاپتہ ہوا ہے۔
پولیس نے بتایا کہ شہری کی گمشدگی کا مقدمہ بلال کالونی پولیس اسٹیشن میں درج ہے۔
عدالت نے لاپتہ شہریوں کی بازیابی کے لیے جے آئی ٹیز اور صوبائی ٹاسک فورس کا اجلاس بلانے کی ہدایت کرے ہوئے سماعت 4 ہفتوں کے لیے ملتوی کر دی۔
