وزیرِ اعظم شہباز شریف نے جنوبی کوریا میں طیارہ حادثے پر افسوس کا اظہار کیا ہے۔
شہباز شریف نے سوشل میڈیا ویب سائٹ ایکس پر اپنی پوسٹ میں لکھا کہ جنوبی کوریا کے موان انٹرنیشنل ایئر پورٹ پر ہوئے المناک حادثے کا جان کر دلی دکھ ہوا۔
اُنہوں نے مزید لکھا کہ حادثے میں کئی قیمتی جانیں ضائع ہوئیں۔
وزیرِ اعظم نے یہ بھی لکھا کہ ہم دکھ کی اس گھڑی میں کورین عوام اور حکومتِ جمہوریہ کوریا کے ساتھ ہیں۔
واضح رہے کہ جنوبی کوریا کے طیارے میں لینڈنگ کے دوران آگ لگ گئی تھی، حادثے میں 124 افراد ہلاک ہوگئے۔
مقامی فائر ایجنسی کے مطابق بہت سے افراد طیارے سے باہر گرنے کے باعث ہلاک ہوئے، حادثہ ممکنہ طور پر پرندہ ٹکرانے اور خراب موسم کے باعث پیش آیا، حادثے کی اصل وجہ کا اعلان مکمل تحقیقات کے بعد کیا جائے گا۔
جنوبی کوریا کی ایئر لائن کا طیارہ بنکاک سے واپس جارہا تھا۔
