لاہور ( ڈیلی پاکستان آن لائن ) وزیر تعلیم رانا سکندر حیات نے لاہور کے دور دراز علاقے میں قائم ایک فلاحی سکول کی سالانہ تقریب تقسیم انعامات میں شرکت کی اور طلبہ میں انعامات تقسیم کیے۔ رانا سکندر حیات رانا ٹاؤن کے کچے راستوں پر قائم شہر سے 43 کلومیٹر دور الکتاب سکول پہنچنے تو طلبہ نے انہیں گارڈ آف آنر پیش کیا۔
وزیر تعلیم نے تقریب سے خطاب کرتے ہوئے سکول کو ذاتی طور پر ایک لاکھ روپے کا عطیہ دینے کا اعلان کیا جبکہ سکول کی جانب آنے والے کچے راستوں کو پکا کرنے کے حوالے سے محکمہ سی اینڈ ڈبلیو اور ایم سی ایل کی توجہ اس علاقے کی جانب مبذول کروانے کا وعدہ بھی کیا۔ رانا سکندر حیات نے سکول کے طلبہ کی پرفارمنس سے متاثر ہو کر اس امر کا بھی اظہار کیا کہ وہ فی طالبعلم ایک ہزار روپے ماہانہ وظیفہ کے حوالے سے حکومت سے سفارش کریں گے۔
انہوں نے کہا کہ ایک کروڑ سے زائد بچے سکولوں سے باہر ہیں، ایسے میں الکتاب سکول نے دور دراز علاقے میں فلاحی سکول قائم کر کے ذمہ دارانہ کردار ادا کیا ہے۔ جس کمٹمنٹ کے ساتھ پاکستان بنایا گیا تھا اسی کمٹمنٹ کے ساتھ ہم نے پنجاب اور تعلیم کی خدمت کا بیڑہ اٹھایا ہے۔ ایسے وسائل سے محروم بچوں کی تعلیم کیلئے کام کرنے والے اداروں کو سپورٹ کرنا ہماری اخلاقی ذمہ داری ہے۔ وزیر تعلیم نے سکول کے منتظمین اور اساتذہ کی کاوشوں کی تحسین بھی کی۔ انہوں نے مزید کہا کم وسیلہ طلبہ کا احساس کرنے والے الکتاب سکول جیسے اداروں کا کردار نہایت حوصلہ افزاء ہے۔
