آئی سی سی چیمپئنز ٹرافی سے قبل نیشنل اسٹیڈیم کراچی کی اپ گریڈیشن جاری ہے۔
پاکستان کرکٹ بورڈ کے مطابق نیشنل اسٹیڈیم کا اپ گریڈیشن پراجیکٹ تیزی سے آگے بڑھ رہا ہے۔
چیئرمین پی سی بی محسن نقوی نے اسٹیڈیم کا دورہ کر کے ترقیاتی کام پر پیش رفت کا جائزہ بھی لیا ہے۔
محسن نقوی نے الیکٹرونک اسکرین کو مناسب جگہ نصب کرنے کی ہدایت کی اور کہا ہے کہ اسکرین کی وجہ سے شائقین کو میچز دیکھنے میں مشکل پیش آتی ہے۔
انہوں نے کہا کہ اسکرین کو اونچائی پر نصب کیا جائے تاکہ شائقین کا ویو بلاک نہ ہو۔
محسن نقوی نے شائقینِ کرکٹ کی سہولت کے لیے پارکنگ ایریا کو اسٹیڈیم کے قریب کرنے اور اپ گریڈیشن پراجیکٹ پر کام مزید تیز کرنے کی ہدایت بھی کی۔
چیئرمین پی سی بی نے کہا کہ دن رات ایک کر کے منصوبے کو وقت سے قبل مکمل کیا جائے، دنیا کی ٹاپ ٹیمیں چیمپئنز ٹرافی ٹورنامنٹ کے لیے آ رہی ہیں، پاکستان کے لیے چیمپئنز ٹرافی کا انعقاد ایک اعزاز ہے۔
انہوں نے ایف ڈبلیو او کے حکام کو پراجیکٹ کی بر وقت تکمیل کے لیے ہدایات دیں جبکہ ایف ڈبلیو او کے حکام نے اپ گریڈیشن میں پیش رفت کے بارے بریفنگ دی۔
