چیئرمین پاکستان کرکٹ بورڈ محسن نقوی نے اس امید کا اظہار کیا ہے کہ محمد رضوان کی قیادت میں پاکستان ٹیم دورۂ آسٹریلیا اور زمبابوے میں اچھی کارکردگی کا مظاہرہ کرے گی۔
آسٹریلیا روانگی سے قبل چیئرمین پی سی بی محسن نقوی سے وائٹ بال کپتان محمد رضوان اور نائب کپتان سلمان آغا نے لاہور میں ملاقات کی۔
محسن نقوی نے کپتان محمد رضوان اور نائب کپتان سلمان علی آغا کے لیے نیک خواہشات کا اظہار کیا۔
ان کا کہنا تھا کہ وائٹ بال ٹیم کی قیادت ایک اعزاز ہے، آسٹریلیا اور زمبابوے سیریز میں قوم کو آپ کی قیادت میں ٹیم سے اچھی کارکردگی کی توقع ہے۔
چیئرمین پی سی بی نے کہا کہ پاکستان ٹیم میں باصلاحیت پروفیشنلز ہیں، آسٹریلیا اور زمبابوے میں اچھی کارکردگی کی امید ہے۔
انہوں نے کہا کہ متحد ہو کر کھیلنا اور آخری بال تک لڑنا کامیابی کی ضمانت ہے، ٹیم اگر ٹیم بن کر پرفارم کرے گی تو کوئی آپ کو ہرا نہیں سکتا۔
اس موقع پر کپتان محمد رضوان اور نائب کپتان سلمان علی آغا نے بھرپور اعتماد کرنے پر چیئرمین پی سی بی محسن نقوی کا شکریہ ادا کیا۔
محمد رضوان نے کہا کہ دورۂ آسٹریلیا و زمبابوے کے دوران بہترین کارکردگی دکھانے کے لیے پُرعزم ہیں۔
انہوں نے کہا کہ قوم کی توقعات پر پورا اترنے کی بھرپور کوشش کریں گے۔
