پرتھ میں شاندار مظاہرہ کرکے تاریخی جیت حاصل کرنے والی ٹیم انڈیا کو پنک بال سے کھیلے گئے ایڈیلیڈ ٹیسٹ میں شرمناک شکست کا سامنا کرنا پڑا ہے۔ آسٹریلیا نے دوسرے ٹیسٹ کے تیسرے دن ہی ہندوستان کو بڑی آسانی سے 10 وکٹ سے ہرا دیا ہے۔ ہندوستان نے دوسری اننگز میں بھی خراب بلے بازی کا مظاہرہ کیا اور صرف 19 رنوں کا ہدف دیا، جسے آسٹریلیا نے بغیر کوئی وکٹ گنوائے حاصل کر لیا۔ اس طرح 5 ٹیسٹ میچوں کی بارڈر گاوسکر سیریز 1-1 کی برابری پر آگئی ہے اور اب اگلا مقابلہ 14 دسمبر سے برسبین میں کھیلا جائے گا۔
کھیل کے دوسرے دن کی طرح تیسرے دن بھی ہندوستانی بلے بازوں نے شرمناک کارکردگی کا مظاہرہ کیا اور دوسری پاری میں پوری ٹیم محض 175 رن بنا کر آؤٹ ہو گئی۔ اس سے پہلے ٹیم پہلی اننگز میں بھی صرف 180 رن بنا کر آؤٹ ہو گئی تھی۔ آسٹریلیا نے اپنی پہلی اننگز میں 337 رن بنائے تھے جس میں ٹریوس ہیڈ کی جارحانہ سنچری شامل تھی۔ اس طرح آسٹریلیا کو 157 رنوں کی سبقت حاصل ہوئی جو آخر میں فیصلہ کن ثابت ہوئی اور ٹیم انڈیا اس سے صرف کچھ رن ہی آگے بڑھ سکی۔
