نتیش اور سندر کی جوڑی نے ٹیم انڈیا کا اسکور 300 کے پار پہنچایا، بارش نے میچ میں ڈالا خلل

بارڈر-گواسکر ٹرافی کے تحت کھلیی جا رہی سیریز کے چوتھے ٹیسٹ کے تیسرے دن ٹیم انڈیا نے بارش کی وجہ سے میچ میں خلل پڑنے تک 7 وکٹ کے نقصان پر 326 رن بنا لیے ہیں۔ اس طرح ٹیم انڈیا نے فالو آن بچا لیا ہے۔ کھیل رکنے تک نتیش ریڈی 85 رن بناکر اور واشنگٹن سندر 40 رن بناکر کریز پر موجود تھے۔ نتیش ریڈی نے آسٹریلیا میں اپنی شاندار بلے بازی کا سلسلہ جاری رکھتے ہوئے نصف سنچری بنانے کے بعد پشپا انداز میں جشن مناکر شائقین کو خوب لطف اندوز کیا۔

اس سے قبل تیسرے دن کے کھیل کی شروعات میں رویندر جڈیجہ اور رشبھ پنت نے اچھی شروعات کی تھی اور اس دوران دونوں بلے بازوں نے گیند کو بہتر طریقے سے کھیلتے ہوئے کئی خوبصورت شاٹس بھی لگائے۔ لیکن جب ایسا لگ رہا تھا کہ پارٹنرشپ جم گئی ہے، تبھی رشبھ پنت 28 رن بنا کر غیر ذمہ دارانہ شاٹ لگا کر اسکاٹ بولینڈ کی گیند پر ناتھن لائن کے ہاتھوں کیچ آؤٹ ہو گئے۔ پھر کچھ دیر بعد ہی جڈیجہ بھی 17 رن بناکر پویلین لوٹ گئے۔ جڈیجہ کو لائن نے ایل بی ڈبلیو آوٹ کیا۔

پنت اور جڈیجہ کے آؤٹ ہو جانے کے بعد ٹیم انڈیا مشکلوں میں پھنس گئی تھی کیونکہ اس کے 221 رن پر ہی 7 وکٹ گر گئے تھے اور آسٹریلیا کے اسکور سے ٹیم ابھی بھی 253 رن پیچھے تھی۔ لیکن یہاں سے نتیش ریڈی اور واشنگٹن سندر نے زبردست مزاحمت کا مظاہرہ کرتے ہوئے ٹیم کو نہ صرف بحران سے نکالا اور فالوآن بچایا بلکہ آسٹریلیا کی سبقت کو کافی کم کر دیا۔ نتیش اور سندر شاندار بلے بازی کر ہی رہے تھے کہ بارش نے میچ میں خلل ڈالا جس کی وجہ سے میچ کو روکنا پڑا۔ بارش کی وجہ سے میچ رکنے کے وقت ٹیم انڈیا نے 7 وکٹ کے نقصان پر 326 رن بنا لیے تھے۔ نتیش ریڈی 8 چوکے اور 1 چھکے کی مدد سے 85 اور واشنگٹن سندر واحد چوکے کی مدد سے 40 رن بناکر کریز پر موجود ہیں۔ دونوں بلے باز آٹھویں وکٹ کے لیے ابھی تک بغیر آؤٹ ہوئے 105 رن جوڑ چکے ہیں۔