ویلنگٹن (ڈیلی پاکستان آن لائن )نیوزی لینڈ کرکٹ بورڈ نے ٹی ٹوینٹی ورلڈ کپ کیلئے سکواڈ کا اعلان کر دیاہے ، کین ولیمسن مسلسل چوتھے ٹی ٹوینٹی ورلڈکپ میں ٹیم کی قیادت کریں گے ۔نیوزی لینڈ کے سکواڈ کا اعلان کسی اعلیٰ حکام کی جانب سے نہیں بلکہ مقامی کلب سے تعلق رکھنے والے 2 بچوں نے پریس کانفرنس کرتے ہوئے کیا ۔
تفصیلات کے مطابق جون میں شروع ہونے والے عالمی میلے کے لیے کیوی ٹیم میں فاسٹ بولر ایڈم ملنے ٹخنے کی انجری کے سبب شامل نہیں مگر اس سکواڈ میں تجربے کار اور نئے کھلاڑیوں کا امتزاج دیکھنے میں آیا ہے۔ ٹیم میں کیون ویلیمسن کے ساتھ فن ایلن، ٹرینٹ بولٹ، مائیکل بریسویل، مارک چیپمین، ڈیون کانوے، لوکی فرگوسن، میٹ ہنری اور ڈیرل مچل شامل ہیں۔
اس کے علاوہ جیمی نیشم، گلین فلپس، رچن رویندرا، مائیکل سینٹنر، ٹم ساؤتھی اور ایش سوڈھی بھی اسکواڈ کا حصہ ہیں جبکہ بین سیئرز کو ٹریولنگ ریزرو کے طور پر شامل کیا گیا ہے۔
ٹیم کا اعلان دلچسپ انداز میں کیا گیا۔ اس کے لیے ایک مقامی کلب سے تعلق رکھنے والے 2 بچوں کو منتخب کیا گیا جنہوں نے نیوز کانفرنس میں ٹیم کا اعلان کیا۔ اس سے قبل ورلڈ کپ کے سکواڈ کا اعلان بھی اسی انداز میں کیا گیا تھا تاہم اس وقت کرکٹرز کے بچوں نے اعلان کیا تھا۔
ٹیم کے اعلان کے ساتھ نیوزی لینڈ نے ٹیم کٹ کی بھی نمائش کردی۔ اس بار نیوزی لینڈ نے سیاہ رنگ کی کٹ کے بجائے 1999 ورلڈ کپ سے تشبیح کٹ اختیار کرنے کا فیصلہ کیا ہے۔ایڈم ملن ٹخنے کی سرجری کے باعث اسکواڈ میں شامل نہیں ہیں جبکہ کائل جیمیسن کمر کی انجری کے ری ہیب کی وجہ سے دستیاب نہیں ہیں۔واضح رہے کہ آئی سی سی ٹی20 ورلڈ کپ کا میلہ رواں برس جون میں امریکا اور ویسٹ انڈیز میں سجے گا۔
