پاکستان ٹیسٹ ٹیم کے کپتان شان مسعود نے کہا ہے کہ مجھے اس ٹیم کی صلاحیتوں پر پورا بھروسہ ہے، ٹیم کے نتائج اس ٹیم کے ٹیلنٹ کے عکاس نہیں۔
کیپ ٹاؤن میں پریس کانفرنس کرتے ہوئے شان مسعود کا کہنا تھا کہ اچھی فائٹ کے میچ کو بھی ہم بھرپور انجوائے کرتے ہیں۔ سنچورین میں ہم نے چار روز اچھی کرکٹ کھیلی۔
انہوں نے کہا کہ جنوبی افریقہ نمبر ون اس لیے ہے کہ وہ تسلسل سے اچھی کرکٹ کھیل رہی ہے، ہمیں اچھی کرکٹ کھیلنے کو عادت بنانا ہوگا اور فتح کی لکیر کو عبور کرنا ہوگا۔
شان مسعود کا کہنا تھا کہ یہاں کی وکٹ سنچورین سے مختلف ہے، گھاس تھوڑا کم ہے۔ حتمی الیون کا فیصلہ ابھی نہیں کیا، ایک بار دوبارہ وکٹ دیکھیں گے پھر طے کریں گے۔
انہوں نے کہا کہ جنوبی افریقہ کی ٹیم میں اب بھی چار سیمرز ہیں، ان کے پاس آل راؤنڈرز ہیں، ہوم ٹیم آل راؤنڈرز کی وجہ سے حتمی الیون میں آسانی سے فیصلہ لے سکتی ہے۔
شان مسعود کا کہنا تھا کہ میرا خیال ہے یہاں اب بھی پیسرز کا تھوڑا بہت کردار ضرور ہوگا، ہم دیکھیں گے اسپیشلسٹ اسپنرز کے ساتھ جائیں یا وہی کامبینیشن رکھیں۔
عامر جمال کے بارے میں بات کرتے ہوئے قومی ٹیم کے کپتان کا کہنا تھا کہ عامر ٹیسٹ ٹیم کا ایک اہم کردار ہے، نمبر 8 پوزیشن پر اس کا کافی اہم رول ہے۔ سنچورین میں میچ کی صورتحال کی وجہ سے اس کو زیادہ موقع نہیں مل سکا۔
انہوں نے کہا کہ ہم نے ایک اوور کا چانس لیا تھا لیکن وہ ہمارے کام نہیں آیا، ہمیں امید ہے کہ وہ کیپ ٹاؤن میں زیادہ بولنگ کریں گے۔
محمد عباس کے اسپیل کے بارے میں بات کرتے ہوئے شان مسعود کا کہنا تھا کہ ہر روز ایسا نہیں ہوسکتا کہ عباس یا کوئی ایک بولر لگاتار 20 اوورز کروائے۔
