چیمپئنز ٹرافی کے لیے پاکستانی اسکواڈ میں پرانے کھلاڑیوں کی واپسی متوقع ہے۔
ذرائع کے مطابق فخر زمان، شاداب خان اور امام الحق کی اسکواڈ میں شمولیت متوقع ہے۔
ذرائع کا کہنا ہے کہ آئی سی سی چیمپئنز ٹرافی کے لیے پاکستان کے اسکواڈ میں واحد وکٹ کیپر کپتان محمد رضوان ہوں گے جبکہ اس بڑے ایونٹ میں 4 فاسٹ بولرز شامل ہوں گے۔
ذرائع کے مطابق چیمپئنز ٹرافی 2025ء کے لیے پاکستان کے اسکواڈ میں 3 اسپنرز کی بھی شمولیت کا امکان ہے۔
فاسٹ بولرز میں شاہین شاہ آفریدی، نسیم شاہ اور حارث رؤف کے ساتھ چوتھے فاسٹ بولر محمد حسنین ہوسکتے ہیں جبکہ ابرار احمد اور سفیان مقیم کے ساتھ تیسرے اسپنر کی حیثیت سے اسکواڈ میں سابق نائب کپتان شاداب خان کی قومی ٹیم میں واپسی کا قوی امکان ہے۔
علاوہ ازیں اسکواڈ میں 7 بیٹرز کو رکھا جائے گا۔
شاداب خان کو جون 2024 میں امریکا اور ویسٹ انڈیز میں کھیلے جانیوالے ٹی 20 ورلڈ کپ کے بعد قومی ٹیم سے ڈراپ کردیا گیا تھا۔
شاداب خان کو آسڑیلیا، زمبابوے اور جنوبی افریقا کے دورے میں پاکستان ٹیم میں منتخب نہیں کیا گیا تھا، البتہ کرکٹ بورڈ نے شاداب خان کو سینڑل کنڑیکٹ 25-2024 کی “سی” کیٹگری میں شامل کر رکھا ہے۔
ٹیم سے ڈراپ ہونے کے بعد شاداب خان اقبال اسٹیڈیم فیصل آباد میں کھیلے گئے چیمپئنز ون ڈے کپ میں پینتھرز کے لیے 5 میچ کھیلے جہاں انہوں نے 120 رنز بنانے کیساتھ 192 گیندوں پر 5 وکٹیں حاصل کیں جبکہ پنڈی اسٹیڈیم میں چیمپئنز ٹی 20 کپ میں شاداب خان نے 6 میچو ں میں 24 رنز بنانے کے علاوہ صرف 18 گیندیں کیں۔
دوسری جانب 29 سال کے بائیں ہاتھ کے اوپننگ بیٹس مین امام الحق نے پاکستان کے لیے 72 بین الاقوامی ون ڈے میچوں میں 48.27 کی اوسط سے 3138 رنز بنا رکھے ہیں۔
چیمپئنز ٹرافی میں قومی ٹیم میں ان کی واپسی کا قوی امکان ہے، 27 اکتوبر 2023ء کو آئی سی سی ورلڈ کپ میں امام الحق جنوبی افریقا کے خلاف اپنا آخری ون ڈے کھیلے تھے، ٹیم سے باہر ہونے کے بعد امام الحق نے چیمپئنز ون ڈے کپ میں 53 کی اوسط سے 4 میچو ں میں 212 رنز بنائے تھے جبکہ چیمپئنز ٹی 20 ٹورنامنٹ میں انہوں نے لائنز کے لیے 9 میچو ں میں 36.67 کی اوسط سے 256 رنز اسکور کئے تھے۔
علاوہ ازیں چیمپئنز ٹرافی اسکواڈ میں جارح مزاج اوپنر فخر زمان کی بھی واپسی متوقع ہے، پاکستان کے لیے 82 بین الاقوامی ون ڈے کھیلنے والے بائیں ہاتھ کے 34 سالہ فخر زمان جن کا پاکستان کرکٹ بورڈ نے سینڑل کنڑیکٹ فٹنس سے مشروط کیا ہوا ہے۔
فخر زمان کو سلیکٹرز نے آسڑیلیا، زمبابوے اور جنوبی افریقا کے دوروں کے لیے منتخب نہیں کیا تھا جس کے بعد حال ہی میں چیمپئنز ٹی 20 میں فخر زمان نے مارخورز کے لیے کھیلتے ہوئے 10 میچو ں میں 30.30 کی اوسط سے 303 رنز 2 نصف سینچریوں کی مدد سے بنائے۔
واضح رہے کہ منی ورلڈ کپ کے نام سے مشہور آئی سی سی چیمپئنز ٹرافی کا نواں ایڈیشن 19 فروری سے 9 مارچ 2025ء تک پاکستان اور یو اے ای میں کھیلا جائیگا۔
