سکردو(ڈیلی پاکستان آن لائن)گلگت بلتستان ایم ایم اے ایسوسی ایشن کے زیراہتمام ایم ایم اے نیشنل چیمپئن شپ 2024 (NFT4) کے کامیاب ٹرائلز کا انعقاد کیا گیا۔پاکستان مکسڈ مارشل آرٹس فیڈریشن کے صدر بابر قیوم راجہ نے گلگت بلتستان ایم ایم اے ایسوسی ایشن کے چیئرمین عبدالسلام اور ان کی پوری ٹیم کو دل کی گہرائیوں سے مبارکباد پیش کی۔ انہوں نے جنرل سیکریٹری سہیل اور صدر مختار حسین کی محنت اور کارکردگی کو بھی سراہا۔
مہمان خصوصی آل اولمپکس مارشل آرٹس گلگت بلتستان نذاکت حسین نے اس کامیاب پروگرام پر ٹیم کی کاوشوں کو سراہا اور سب کو مبارکباد دی۔ یہ کامیاب ٹرائلز گلگت بلتستان کے نوجوانوں کے لیے کھیلوں میں آگے بڑھنے اور اپنی صلاحیتوں کو نکھارنے کا بہترین موقع فراہم کرتے ہیں۔ تمام شرکاء اور منتظمین کی محنت اور تعاون کی بہت تعریف کی گئی۔ ٹرائلز سے منتخب ہونے والے کھلاڑی گلگت بلتستان کی نمائندگی 21 سے 25 نومبر تک ایس اے گارڈنز لاہور میں منعقد ہونے والے نیشنل ایونٹ میں فخر سے کریں گے۔
