(ویب ڈیسک) امریکا کے نومنتخب صدر ڈونلڈ ٹرمپ کے قریبی ساتھی سینیٹر لنزی گراہم نے برطانوی وزیراعظم کئیر اسٹارمر کو دھمکی دی ہے کہ اگر اسرائیلی وزیراعظم نیتن یاہو کو بین الاقوامی فوجداری عدالت (ICC) کے حکم پر گرفتار کیا گیا تو برطانیہ کی معیشت تباہ کر دی جائے گی۔
غیر ملکی میڈیا رپورٹ کے مطابق امریکی سینیٹر لنزی گراہم نے واضح طور پر کہا کہ وہ ممالک جو آئی سی سی کے حکم کی پیروی کریں گے، انہیں اقتصادی نتائج کا سامنا کرنا پڑے گا, یہ دھمکی اس وقت دی گئی جب عالمی فوجداری عدالت نے نیتن یاہو اور ان کے سابق وزیر دفاع یوواف گیلنٹ کے خلاف وارنٹ گرفتاری جاری کیے۔ اس فیصلے کے بعد برطانوی وزیراعظم کئیر اسٹارمر نے کہا کہ برطانیہ کو اپنے قانونی فرائض ادا کرنا ہوں گے، جس سے آئی سی سی کے فیصلے کی پیروی کی بات سامنے آئی۔
یورپی یونین کے خارجہ پالیسی چیف جوزف بوریل نے بھی کہا تھا کہ تمام رکن ممالک اس فیصلے پر عمل درآمد کے پابند ہیں۔
بین الاقوامی فوجداری عدالت کے وارنٹ گرفتاری کے مطابق، اسرائیلی رہنماؤں نیتن یاہو اور گیلنٹ پر مقبوضہ فلسطینی علاقوں میں نسل کشی کے الزامات ہیں، جس کے باعث دونوں افراد کو مفرور مجرم سمجھا جا رہا ہے۔
کینیڈا نے آئی سی سی کے حکم کی حمایت کرتے ہوئے کہا ہے کہ وہ اس کے فیصلے کا احترام کرتا ہے، جبکہ اٹلی اور نیدرلینڈز نے بھی اعلان کیا ہے کہ اگر نیتن یاہو اور گیلنٹ ان کے ممالک میں داخل ہوتے ہیں تو انہیں گرفتار کر لیا جائے گا۔
اس تناظر میں برطانوی وزیراعظم کو اس معاملے میں مشکل فیصلوں کا سامنا ہے اور عالمی سطح پر اس بات پر زور دیا جا رہا ہے کہ بین الاقوامی عدالتوں کے فیصلوں کا احترام کیا جائے۔
