|
سعودی عرب کی انسانی ہمدردی سے متعلق ایجنسی نے جمعرات کو کہا ہے کہ اسرائیل کی جانب سے رفح اور غزہ کے لیے دوسری سرحدی گزرگاہوں کو بند کیے جانے کے نتیجے میں امدادی سامان بھیجنے کی کوششوں میں رکاوٹ پیدا ہو رہی ہے جس سے خوراک کے خراب ہونے کا بھی خدشہ ہے۔
حکومت کی سرپرستی میں کام کرنے والی امدادی ایجنسی ’کنگ سلمان ہیومینی ٹیرین ایڈ اینڈ ریلیف سینٹر ‘کے سربراہ عبداللہ الربیعہ نے بتایا کہ امدادی سامان سے بھرے ہوئے سینکڑوں ٹرک سرحدی گزرگاہ رفح میں رکے ہوئے ہیں کیونکہ اسرائیل نے رفح اور دوسری سرحدی گزرگاہیں بند کر رکھی ہیں۔ ہم غزہ کے لوگوں تک پہنچنے کے لیے بہت بڑی رکاوٹوں کا سامنا کر رہے ہیں۔
سعودی امدادی ایجنسی گزشتہ چند برسوں میں دنیا بھر میں 6 ارب ڈالر سے زیادہ مالیت کا امدادی سامان مہیا کر چکی ہے۔
ایجنسی کے سربراہ ربیعہ کا کہنا تھا کہ ہمارے سینکڑوں ٹرک 7 مئی سے، جب اسرائیل نے رفح پر حملہ کیا تھا، غزہ میں داخلے کے منتظر ہیں تاکہ ان پر موجود خوراک کے استعمال کی تاریح ختم ہونے سے پہلے ہم انہیں ویئر ہاؤسز میں پہنچا سکیں۔
اقوام متحدہ کے حکام کا کہنا ہے کہ غزہ کے فلسطینیوں کے لیے خوراک اور ادویات مصر میں جمع ہو رہی ہیں جب کہ اب کبھی کبھار غزہ میں فلسطینیوں کے لیے خوراک اور ادویات اردن اور مغربی کنارے سے کریم شالوم کے راستے سے بھیجی جار ہی ہے۔
کچھ حکام کا کہنا ہے کہ 2500 ٹرک سرحدی گزرگاہ کھلنے کا انتظار کر رہے ہیں اور مصر میں گودام سامان سے تقریباً پوری طرح بھر چکے ہیں۔
ربیعہ نے رائٹرز کو بتایا کہ ہمیں خدشہ ہے کہ کراسنگ بند ہونے کی وجہ سے کھانے پینے کی چیزیں اپنے قابل استعمال ہونے کی اختتامی مدت کو پہنچنے والی ہیں اور ہم ان کی جانچ پڑتا ل کر رہے ہیں جس کی وجہ سے ہم پر بھاری بوجھ پڑ گیا ہے۔
غزہ میں جنگ اس وقت شروع ہوئی جب حماس کے مسلح عسکریت پسندوں نے 7 اکتوبر کو جنوبی اسرائیل پر حملہ کر کے، 1200 افراد کو ہلاک کیا اور 250 کو یرغمالوں بنا کر اپنے ساتھ غزہ واپس لے گئے، جب کہ غزہ کی وزارت صحت کے مطابق، اسرائیل کی جوابی کارروائی میں 38000 سے زیادہ افراد ہلاک ہو چکے ہیں۔
غزہ میں کینسر کے کچھ مریضوں کو علاج معالجے کے لیے سعودی عرب لے جانے سے متعلق ربیعہ نے عمان میں فلسطین کے صحت کے حکام اور امدادی عہدے داروں کے ساتھ معاہدے پر دستخط کیے ہیں۔ ان کا کہنا تھا کہ لاکھوں ڈالر کے ایک اور پراجیکٹ کے تحت جنگ سے متاثرہ ان ہزاروں فلسطینیوں کو مصنوعی اعضا لگائے جائیں گے جو اپنے اعضا سے محروم ہو گئے ہیں۔
ربیعہ نے اقوام متحدہ کے اداروں اور غیر سرکاری تنظیموں کے ساتھ اپنی آواز شامل کرتے ہوئے اسرائیل پر زور دیا ہے کہ وہ فوری طور پر پابندیاں اٹھائے اور خوراک کو ایک جنگی ہتھیار کے طور پر استعمال کا سلسلہ ترک کرے۔
انہوں نے مزیدکہاکہ اسرائیل بچوں،خواتین اور بوڑھوں کی زندگیاں بچانے کے لیے کوئی پابندی لگائے بغیر تمام سرحدی گزرگاہیں کھول دے۔
فلسطینی علاقوں میں امداد کی ترسیل کو مربوط بنانے سے متعلق اسرائیل کی وزارت دفاع کی ایک ایجنسی سی او جی اے ٹی نے کہا ہے کہ وہ غزہ میں امداد کی ترسیل بڑھانے کی کوششوں میں مصروف ہیں۔
سعودی امددی ایجنسی نے کہا ہے کہ وہ اقوام متحدہ کے اشتراک سے ریاض سے العرش اور رفح تک امداد کے لیے 54 سے زیادہ سویلین اور فوجی پروازیں اور جدہ سے 8 بحری جہاز بھیج چکی ہے۔
ان کا مزید کہنا تھا کہ ضرورت اس سے کہیں بڑھ کر ہے۔ اس وقت ہم عارضی خیموں کے لیے بھی کام کر رہے ہیں اور اگر طویل جنگ بندی ہو جاتی ہے تو انہیں خیموں سے گھروں میں منتقل کرنے کے لیے بڑے پیمانے پر تعمیر نو کے منصوبے شروع کرنے ہوں گے۔
(اس رپورٹ کے لیے معلومات رائٹرز سے لی گئیں ہیں)
