|
اسرائیلی فوج نے کہا ہےکہ اس نے مغربی کنارے میں مزید پانچ عسکریت پسندوں کو ہلاک کر دیا، جن میں ایک مقامی کمانڈر بھی شامل ہے، اس نے جمعرات کو غزہ میں جنگ کے آغاز کے بعد سے اس مقبوضہ علاقے میں اپنی سب سے مہلک کارروائی میں مزید پیش رفت کی۔
اسرائیل کا کہنا ہے کہ شمالی مغربی کنارے میں منگل کو دیر گئے شروع ہونے والے چھاپوں کا مقصد جس میں ابتک کل 16 افراد ہلاک ہو چکے ہیں، حملوں کو روکنا ہے۔ فلسطینی اسے غزہ میں جنگ کے وسیع ہونے اور اس علاقے پر اسرائیل کی دہائیوں سے جاری فوجی حکمرانی کو برقرار رکھنے کی کوشش کے طور پر دیکھتے ہیں۔
ان چھاپوں پر اقوام متحدہ اور ہمسایہ ملک اردن کے ساتھ ساتھ برطانوی اور فرانسیسی رہنماؤں نے بھی خطرے کے بارے میں انتباہ کیا ہے اور حماس اور اسرائیل کے درمیان تقریباً 11 ماہ کی لڑائی کے بعد غزہ میں جنگ بندی کی فوری ضرورت پر زور دیاہے۔
وسطی غزہ کے العودہ اسپتال کے طبی ماہرین نے جمعرات کو بتایا کہ پرہجوم نوصیرات پناہ گزین کیمپ پر اسرائیلی حملوں میں آٹھ فلسطینی ہلاک اور 20 زخمی ہوئے۔
مغربی کنارے میں عسکریت پسند گروپ اسلامی جہاد نے تصدیق کی ہے کہ محمد جابر، جنہیں ابو شجاع کے نام سے جانا جاتا ہے، تلکرم شہر میں ایک چھاپے کے دوران ہلاک ہوگئے ہیں۔ وہ اس سال کے شروع میں بہت سے فلسطینیوں کے لیے ایک ہیرو بن گئے تھے جب انکے ایک اسرائیلی آپریشن میں مارے جانے کی اطلاع ملی تھی، لیکن پھر وہ دوسرے عسکریت پسندوں کے جنازے میں حیران کن طور پر سامنے آئے، جہاں انہیں ایک نعرے لگاتے ہجوم نے کندھوں پر اٹھا لیا تھا۔
اسرائیل نے جمعرات کو مقبوضہ مغربی کنارے میں ایک بڑے پیمانے پر فوجی آپریشن پر زور دیا جس میں دو دنوں میں کم از کم 16 فلسطینی ہلاک ہوئے ہیں، اقوام متحدہ کے ان خدشات کے باوجود یہ “پہلے سے ہی دھماکہ خیز صورتحال کو ہوا دے رہا ہے”۔
اسرائیلی فوج نے کہا کہ بدھ کی صبح سے شمالی مغربی کنارے میں جاری بقول اسکے “انسداد دہشت گردی” آپریشن میں 16 فلسطینی ہلاک ہو چکے ہیں۔ فلسطینی وزارت صحت نے بھی وہی اعداد و شمار بتائے تھے، دونوں نے پہلے ٹولوں پر نظر ثانی کی تھی۔
غزہ میں پولیو کیس
ورلڈ ہیلتھ آرگنائزیشن نے کہا کہ اسرائیل نے غزہ کے کچھ حصوں میں اتوار سے شروع ہونے والے کم از کم تین دن کے “انسانی ہمدردی کے وقفے” پر رضامندی ظاہر کی ہے، تاکہ علاقے میں ایک بار ختم ہو جانے والے پولیو کے پہلے کیس کی تصدیق کے بعد ویکسینیشن مہم کو آسان بنایا جا سکے۔
اسرائیلی حکام نے اے ایف پی کی جانب سے تبصرہ کرنے کی درخواست کا فوری طور پر جواب نہیں دیا، لیکن وزیراعظم بنجمن نیتن یاہو نے بدھ کے روز کہاتھا کہ حماس کے 7 اکتوبر کے حملے سے شروع ہونے والی تقریباً 11 ماہ پرانی جنگ میں یہ اقدامات “جنگ بندی نہیں” ہیں۔
فوج نے کہا کہ اس نے جمعرات کے روز سات عسکریت پسندوں کو ہلاک کیا، جن میں تلکرم پناہ گزین کیمپ میں پانچ عسکریت پسند بھی شامل ہیں۔
فوج نے بتایا کہ جمعرات کو جنین میں دو دیگر عسکریت پسند مارے گئے ہیں۔
اقوام متحدہ کے سربراہ انتونیو گوتریس نے ان کارروائیوں کو فوری طور پر بند کرنے” پر زور دیا، جو “مقبوضہ مغربی کنارے میں پہلے سے ہی دھماکہ خیز صورتحال کو ہوا دے رہی ہیں۔”
یہ رپورٹ اے پی اور اے ایف پی کی اظلاعات پر مبنی ہے۔
