نئی دہلی(مانیٹرنگ ڈیسک) بالی ووڈ کنگ شاہ رخ خان اور بھارت کے امیر ترین شخص مکیش امبانی کی وزیراعظم نریندر مودی کی تقریب حلف برداری میں سستا ’او آر ایس‘ پینے کی تصویر انٹرنیٹ پر وائرل ہو گئی جہاں لوگ حیرت سے سوال پوچھ رہے ہیں کہ ایسی بڑی شخصیات بھی اتنا سستا ڈرنک پیتی ہیں؟
انڈیا ٹائمز کے مطابق اس تصویر میں مکیش امبانی اور شاہ رخ خان کے ہاتھوں میں او آر ایس کے ڈبے ہوتے ہیں اور وہ دونوں او آر ایس پیتے ہوئے ایک دوسرے سے محو گفتگو ہوتے ہیں۔ او آر ایس کے اس ڈبے کی قیمت صرف 30روپے ہے۔اس تصویر پر جہاں بیشتر انٹرنیٹ صارفین شاہ رخ خان اور مکیش امبانی کی سادگی کی تعریف کر رہے ہیں، بہت سارے اس پر میمز بھی پوسٹ کر رہے ہیں۔
ایک صارف نے اپنے کمنٹ میں طنزیہ طور پر لکھا ہے کہ ’’بس اتنا امیر ہونا ہے کہ ایسے او آر ایس پی سکوں۔‘‘ایک شخص نے لکھا ہے کہ او آر ایس سستا ضرور ہے لیکن شوگری مشروبات کی نسبت کہیں بہتر ہے۔ اس کے کئی طبی فوائد بھی ہیں۔گرمیوں کے موسم میں یہ بہترین انتخاب ہے۔
