سٹاک مارکیٹ میں زبردست تیزینیاریکارڈ  قائم ہو گیا

کراچی(ڈیلی پاکستان آن لائن)سٹاک ایکسچینج (پی ایس ایکس) میں ریکارڈز بننے کا سلسلہ جاری ہے، جمعرات کو ٹریڈنگ کے دوران بینچ مارک کے ایس ای 100انڈیکس پہلی بار 97 ہزار پوائنٹس کی بلند ترین سطح پرجاپہنچا۔

نجی ٹی وی چینل آج نیوز کے مطابق دوپہر ایک بجکر 35 منٹ پر بینچ مارک انڈیکس 1509.68 پوائنٹس یا 1.58 فیصد اضافے سے 97056.13 پوائنٹس کی بلند ترین سطح پر پہنچ گیا۔

آٹوموبائل اسمبلرز، کمرشل بینکوں، فرٹیلائزرز، فارماسیوٹیکل اور ریفائنری کے شعبوں میں خریداری دیکھی گئی۔ این آر ایل، حیسکول، پی ایس او، ای ایف ای آر ٹی، ایچ بی ایل اور این بی پی سمیت کمپنیوں کے حصص میں مثبت کاروبار ہوا۔ 

ماہرین کا کہنا ہے کہ 24 نومبر کو ہونے والے سیاسی احتجاج کے حوالے سے سرمایہ کاروں کے خدشات میں کمی کے باعث یہ خریداری دیکھنے میں آئی ہے ۔حالیہ ہفتوں میں مثبت میکرو اکنامک اشارے اور کلیدی پالیسی شرح میں مزید کمی کے تخمینوں کی وجہ سے اسٹاک مارکیٹ میں تیزی آئی ہے۔

یاد رہے کہ بدھ کو بینچ مارک کے ایس ای 100 انڈیکس 310 پوائنٹس کی کمی سے 95,546.45 پر بند ہوا۔