پاکستان تحریک انصاف (پی ٹی آئی) کا احتجاجی قافلہ وفاقی دارالحکومت اسلام آباد میں موجود ہے۔ پی ٹی آئی کارکنان ڈی چوک پہنچ چکے ہیں جہاں سیکیورٹی اہلکاروں اور مظاہرین کے درمیان جھڑپیں ہوئی ہیں۔ ڈی چوک کے قریب شیلنگ اور فائرنگ سے متعدد افراد کے زخمی ہونے کی بھی اطلاعات ہیں۔ پی ٹی آئی کے احتجاج کی قیادت سابق وزیرِ اعظم عمران خان کی اہلیہ بشریٰ بی بی اور وزیرِ اعلیٰ خیبر پختونخوا علی امین گنڈا پور کر رہے ہیں۔ پی ٹی آئی کا مطالبہ ہے کہ سابق وزیرِ اعظم عمران خان کو رہا کیا جائے۔ حکومت یہ کہہ چکی ہے کہ عمران خان کو رہا حکومت نے نہیں عدالت نے کرنا ہے۔
