لاہور ( ڈیلی پاکستان آن لائن ) مخدوم الاولیا سیدنا حضرت علی ہجویری المعروف داتا گنج بخش رحمتہ اللہ علیہ کے 981 ویں عرس کا آج دوسرا روز ہے، عرس کی تقریبات میں زائرین بڑی تعداد میں شرکت کر رہے ہیں۔
حضرت علی ہجویری رحمتہ اللہ علیہ کے عرس کے دوسرے روز بھی لاہور سمیت ملک کے دیگر شہروں سے آنیوالے زائرین کی جانب سے مزار پر حاضری دیکر فاتحہ خوانی اور چادریں چڑھانے کا سلسلہ جاری ہے۔عرس کے موقع پر روایتی گہماگہمی نظر آرہی ہے، عقیدت مند ڈھول کی تھاپ پر بھنگڑے ڈالتے ہوئے چادریں چڑھانے کیلئے آرہے ہیں۔عرس میں آئے زائرین کیلئے لنگر کا بھی خصوصی اہتمام کیا گیا ہے، زائرین کی دودھ، نان حلیم، گوشت اور چاولوں سے تواضع کی جارہی ہے، دودھ کی روایتی سبیل پر زبردست رش ہے، جہاں لوگ قطاروں میں لگ کر دودھ پیتے نظر آتے ہیں۔عرس کے موقع پر سکیورٹی کے بھی سخت انتظامات کئے گئے ہیں، شرکا کی مختلف مقامات پر چیکنگ کی جارہی ہے جبکہ ٹریفک کا رخ متبادل راستوں کی جانب موڑ دیا گیا ہے۔پنجاب حکومت کی جانب سے عرس کے موقع پر کل 26 اگست بروز پیر عام تعطیل کا اعلان کیا گیا ہے،نوٹیفکیشن کے مطابق کل ضلعی انتظامیہ کے دفاتر، عدالتیں اور تعلیمی ادارے بند رکھے جائیں گے۔
