پاکستان کے وائٹ بال کپتان محمد رضوان کا کہنا ہے کہ کرکٹ سے محبت کرنے والے ملک کے طور پر ہم سب آئی سی سی چیمپیئنز ٹرافی 2025 کی میزبانی کے لیے بہت پرجوش ہیں۔
اپنے بیان میں محمد رضوان نے کہا کہ حال ہی میں ون ڈے میں اللّٰہ کی مدد سے اچھی کارکردگی کا مظاہرہ کرنے سے میگا ایونٹ کےلیے جوش و خروش اور ٹیم کی تیاری اور تعمیر میں اضافہ ہوا ہے۔
قومی ٹیم کے کپتان کا کہنا تھا کہ ہم بےتابی سے اپنے ہوم کراؤڈ کے سامنے کھیلنے اور 8 ٹیموں کے ٹورنامنٹ میں شاندار کارکردگی کا مظاہرہ کرنے کے منتظر ہیں۔
انہوں نے کہا کہ آئی سی سی چیمپئنز ٹرافی 2025 کی میزبانی ایک بہترین موقع ہے کیونکہ پاکستان 28 برسوں میں اپنے یہاں پہلے آئی سی سی ایونٹ کا خیرمقدم کرتا ہے، بالخصوص تب جبکہ ہم دفاعی چیمپئن ہیں۔ ہم اپنے مداحوں کی امیدوں پر پورا اترنے کی کوشش کریں گے۔
محمد رضوان کا کہنا تھا کہ ہمارا ملک اپنی شاندار مہمان نوازی کےلیے پہچانا جاتا ہے اور مجھے یقین ہے کہ شائقین ناصرف ہماری ٹیم کو سپورٹ کریں گے بلکہ دیگر ٹیموں کی کارکردگی کو بھی سراہیں گے۔
