پاکستان کرکٹ بورڈ (پی سی بی) نے ویمنز پینل آف امپائر کےلیے ریٹینرز متعارف کرادیے۔
پاکستان کرکٹ بورڈ نے اپنی خواتین امپائرز کے پینل کےلیے ریٹینرز کو متعارف کرادیا ہے، پینل میں شامل تمام 7 خواتین امپائرز کو ماہانہ 32 ہزار روپے ملیں گے۔
حال ہی میں پی سی بی نے لاہور میں 4 روزہ خواتین امپائرز انڈکشن کورس کا انعقاد کیا تھا، جس میں پاکستان ویمنز ٹیم کی کپتان ندا ڈار اور سابق انٹرنیشنل کرکٹر سخن فیض سمیت 13 خواتین نے شرکت کی تھی۔
پی سی بی ریٹینرز کے ساتھ کرکٹ سیزن کے دوران اپنے میچ آفیشلز کو میچ فیس، یومیہ الاؤنس، ہوٹل میں رہائش، ہوائی اور زمینی سفر سمیت دیگر فوائد بھی فراہم کرتا ہے۔
پی سی بی کے سینئر منیجر امپائرز اور ریفریز، بلال قریشی کا کہنا ہے کہ خواتین کو امپائرنگ کے میدان میں آگے بڑھتے ہوئے دیکھنا خوش آئند ہے۔
انہوں نے مزید کہا کہ پی سی بی نے ان امپائرز کی عزت و احترام کو یقینی بناتے ہوئے رہائش اور سفر کی فراہمی کے ساتھ ماہانہ ریٹینرز متعارف کرائے ہیں۔
بلال قریشی نے یہ بھی کہا کہ یہ قدم مزید خواتین کو آگے آنے کی ترغیب دے گا، پی سی بی خواتین کو اس شعبے میں آنے اور ترقی کرنے کی ترغیب دیتا رہے گا۔
پی سی بی ویمنز پینل آف امپائرز میں شامل امپائرز یہ ہیں، عافیہ امین، حمیرا فرح، نازیہ نذیر، رفعت مصطفیٰ، صباحت رشید، سلیمہ امتیاز اور شکیلہ رفیق ہیں۔
