امریکہ میں بھارتی لڑکے کی جانب سے میڈ اِن پاکستان جیکٹ خریدنے پر بھارتی سوشل میڈیا صارفین برس پڑے

نیویارک(مانیٹرنگ ڈیسک) بھارت میں پاکستان کا جس قدر منفی تشخص میڈیا اور سیاستدانوں کی تقاریر و بیانات کے ذریعے بتایا جاتا ہے، اس کے بعد اس بھارتی نوجوان کا امریکہ کی ہارورڈ یونیورسٹی میں 12ہزار بھارتی روپے (تقریباً 40ہزار پاکستانی روپے) کی ’میڈ اِن پاکستان‘ جیکٹ دیکھ کر اتنا تو حیران ہونا بنتا تھا۔ 

این ڈی ٹی وی کے مطابق ایشان شرما نامی اس نوجوان نے اپنے ایکس اکاؤنٹ پر ایک پوسٹ کے ذریعے بتایا ہے کہ ’’میں شاپنگ کے لیے ہارورڈ گیا اور 12ہزار روپے کی یہ جیکٹ خریدی مگر ’میڈ اِن پاکستان؟‘ ایشان شرما کی یہ پوسٹ تیزی سے وائرل ہوئی اور بھارتی شہریوں نے اس پر کمنٹس میں پاکستان کے خلاف اسی منفی پراپیگنڈے کے زیراثر نفرت انگیز رویئے کا مظاہرہ شروع کر دیا۔
ایک شخص نے کمنٹس میں لکھا کہ ’’یہ جیکٹ مت خریدنا، یہ انتہائی گھٹیا ہے۔ میں نے اسی ڈیزائن میں یہی جیکٹ خریدی تھی اور پہلی بار پہننے پر ہی خراب ہو گئی تھی۔‘‘

 ایک صارف نے ایشان شرما کی کلاس لیتے ہوئے لکھا کہ ’’ہم ہمیشہ ڈالرز کو روپوں میں تبدیل کرکے کیوں دیکھتے ہیں۔ اس جیکٹ کی قیمت محض 145ڈالر ہے۔ آئی فون ڈیڑھ سو سے 200ڈالر کا ہے اور ’میڈ اِن چائنہ‘ ہے۔ آپ لوگ برانڈ ویلیو ادا کر رہے ہو، مینوفیکچرنگ پرائس نہیں۔‘‘