نئی دہلی (ڈیلی پاکستان آن لائن )بھارتی ایئر لائن کے عملے کی بڑی تعداد ایک ساتھ بیمار ہوگئی اور سب نے ایک ساتھ ہی اپنے موبائل فونز بھی بند کرلیے۔
بھارتی میڈیا کے مطابق ایئر انڈیا ایکسپریس کے کیبن کریو کے تقریباً 300 سینئر ارکان اچانک بیماری کی وجہ بتا کر چھٹی پر چلے گئے اور سب نے موبائل فونز بھی بند کرلیے۔اس معاملے کی وجہ سے مقامی اور بین الاقوامی 86 پروازیں منسوخ کردی گئیں۔بھارتی میڈیا کے مطابق ذرائع کا کہنا ہے کہ احتجاج کرنے والے ملازمین سے ایئر انڈیا ایکسپریس کی انتظامیہ رابطہ کرنے کی کوشش کر رہی ہے۔ احتجاج کرنے والے عملے کا مؤقف ہے کہ ملازمین کے ساتھ رویہ ٹھیک نہیں جبکہ معاوضے کے حوالے سے بھی کمی اور تبدیلی کی جارہی ہے۔
ایئر لائن کے ترجمان نے مسافروں سے معذرت کرتے ہوئے کہا ہے کہ اس معاملے کو حل کرنے کی کوشش کی جارہی ہے، مسافروں کے ٹکٹ کے پیسے واپس کیے جائیں گے۔دوسری جانب اس معاملے کی وجہ سے متاثر ہونے والے مسافروں نے احتجاج بھی کیا۔
