اتر پردیش(ڈیلی پاکستان آن لائن ) بھارت میں اشنان کے لئے گنگا جمنا جانے کے دوران ہندو یاتریوں کی ٹریکٹر ٹرالی تیز رفتاری کے باعث تالاب میں الٹ گئی جس کے نتیجے میں 24 افراد ہلاک ہوگئے۔
امت نیوز کے مطابق بھارتی میڈیا نے بتایا کہ بھارتی ریاست اترپردیش میں حادثے کا شکار ہونے والے 30 سے زائد ہندو یاتری اپنی رسومات کی ادائیگی اور اشنان کے لئے دریائے گنگا جمنا جا رہے تھے۔
خطرناک موڑ کاٹتے ہوئے ٹریکٹر ٹرالی مبینہ طور پر تیز رفتاری کے باعث ڈرائیور کے قابو سے باہر ہوکر تالاب میں جا گری اور تمام مسافر گندے تالاب میں ڈوب گئے۔
امدادی کاموں کے دوران تالاب سے 24 یاتریوں کی لاشیں نکالی گئی ہیں جبکہ 8 افراد کو شدید زخمی حالت میں ہسپتال منتقل کیا گیا ہے۔ 8 زخمیوں میں سے 4 کی حالت نازک ہونے کے سبب ہلاکتوں میں اضافے کا خدشہ ہے۔
