لاہور ( ڈیلی پاکستان آن لائن )وزیر اعلیٰ مریم نواز نے نواز شریف آئی ٹی سٹی پراجیکٹ کے سنگ بنیاد کی تقریب سے خطاب کرتے ہوئے کہا ہےکہ صرف اڑھائی ماہ کی مختصر عرصے میں نواز شریف آئی ٹی سٹی کا سنگ بنیاد رکھ دیا ہے۔ نواز شریف آئی ٹی سٹی کے سنگ بنیاد سے آج نئی تاریخ لکھی جا رہی ہے، میرا دل خوشی سے معمور ہے۔آئی ٹی سٹی نواز شریف کے نام سے منسوب ہے، جنہوں نے جدید پاکستان کی بنیاد رکھی،ہمیشہ ترقی کی راہ ہموار کی۔ نواز شریف نے تھری جی،فورجی کی بنیاد رکھی، موٹر ویز، ایٹمی دھماکے سب نواز شریف نے کیا۔
وزیر اعلیٰ مریم نواز نے کہا کہ پاکستان میں آئی ٹی کا انقلاب دیکھنا چاہتی ہوں۔ عمران امین کو شاباش دیتی ہوں،انہوں نے بہت اچھا کام کیا ہے،اب آئی ٹی سٹی جلد از جلد مکمل کر کے دکھا دیں۔نواز شریف سٹی میں متعدد انٹرنیشنل ٹیک جائنٹس آ رہے ہیں، 10 کمپنیاں اپنے آفس بنانے آرہی ہیں۔ انہوں نے کہا کہ نواز شریف آئی ٹی سٹی 853 ایکڑ پر مشتمل ہے، دس سال کے لیے اسے ٹیکس فری کردیا ہے۔ نواز شریف آئی ٹی سٹی میں آئی ٹی اینڈ ٹیک دسٹرکٹ، نالج سٹی اور فلم سٹی ہوگا۔ نالج میں انٹرنیشنل یونیورسٹیاں اپنے کیمپس بنائیں گی۔
وزیر اعلیٰ مریم نوازنے کہا کہ فلم کی ترقی کے لئے نواز شریف آئی ٹی سٹی میں فلم سٹی بنے گا جس میں جدید ساز و سامان اور ٹیکنالوجی ہوگی۔ کمپنیوں کو بزنس میں مراعات دینے کے لیے این ایس آئی ٹی کو 10 سال کے لیے ٹیکس فری کر دیا ہے۔کمپنیوں کو لینڈ چاہیے تو لینڈ دیں گے گرے سٹرکچر چاہیئے تو وہ بنا کر دیں گے۔ نوجوانوں کی آئی ٹی میں ترقی کے لیے انکیوبیٹرز بنا کردیں گے، نوجوان 3 ماہ میں اپنا کام شروع کریں۔ چند دن پہلے 4 ہزار بچوں کے لیے سکلز ڈویلپمنٹ پروگرام شروع کیا ہے جس میں مارکیٹ بیسڈ آئی ٹی کے کورسز کرانے جا رہے ہیں۔
انہوں نے کہا کہ بچوں کے لیے ایکسپرٹ ٹرینرز بلائے کہ وہ بچوں ٹریننگ کی تکمیل کے ساتھ ہی جاب ملے۔ نواز شریف آئی ٹی سٹی ہمارے نوجوانوں کو دنیا کے ساتھ قدم سے قدم ملانے کا موقع دے گا۔ بچوں کو آئی ٹی کورسز کے اختتام پر انٹر نیشنل سرٹیفیکیشن ملے گی تاکہ فری لانسنگ میں مزید آسانی ہو۔بھارت میں اتنا بڑا آئی ٹی انقلاب آیا ہے تو پاکستان میں کیوں نہیں آ سکتا؟
وزیر اعلیٰ مریم نواز نے ہدایت کی کہ ایک سال میں آئی ٹی کی سٹی کی 10بلدنگز بن جانی چاہیئیں۔موٹر وے، لیپ ٹاپ، تھری جی، فور جی یہ سب مسلم لیگ(ن) کی نشانیاں ہیں۔ فری وائی فائی پورے پنجاب میں دیں گے۔ جلد دوبارہ لیپ ٹاپ سکیم شروع کر رہے ہیں، انشاء اللہ جلد ای بائیکس مہیا کریں گے۔ درخواست دینے والی 10 ہزار کے قریب بچیوں کو ای بائیکس دینے کی ہدایت کی ہے۔
سینیٹر پرویز رشید، وفاقی وزیر شیزا خواجہ، سینئر منسٹرمریم اورنگزیب، صوبائی وزیر اطلاعات و ثقافت عظمیٰ زاہد بخاری، صوبائی وزرا ء خواجہ سلمان رفیق،مجتبیٰ شجاع الرحمن،صہیب احمد برتھ، ذیشان رفیق، بلال اکبر،معاون خصوصی ذیشان ملک، ایم پی اے ثانیہ عاشق،چیف سیکرٹری، چیئرمین روڈا اظفر ناصر، کمشنر اور دیگر حکام بھی موجود تھے۔
