ممبئی(ڈیلی پاکستان آن لائن )بھارت کے سینئر اداکار جیکی شروف نے سیلفی لینے والے مداح کے سر پر تھپڑ مار دیا جس کی ویڈیو سوشل میڈیا پر گردش کررہی ہے۔
نجی ٹی وی ایکسپریس نیوز نے بھارتی میڈیا کے حوالے سے بتایا کہ حال ہی میں جیکی شروف نے ممبئی میں مداحوں سے ملاقات کی، منفرد لباس میں ملبوس سینئر اداکار نے ہاتھ میں پودوں کے گملے بھی اٹھائے ہوئے تھے۔وائرل ویڈیو میں دیکھا جاسکتا ہے کہ جیکی شروف نے ان کے ساتھ تصویر بنوانے والے ایک مداح کو مزاحیہ انداز میں مشورہ دیا کہ مجھے کمر کے پاس سے نہیں پکڑو بلکہ میرے کندھے پر ہاتھ رکھ کر تصویر لو۔بعدازاں، ایک اور مداح جیکی شروف کے ساتھ سیلفی لینے کے لئے آگے بڑھا تو اداکار نے مداح کے سر پر تھپڑ مارا اور مداح کو پہلے ایک طرف کیا اور پھر اس کے ساتھ سیلفی لی۔یہ ویڈیو جیسے ہی سوشل میڈیا پر وائرل ہوئی تو مداحوں نے جیکی شروف کے اس عمل پر شدید غصے کا اظہار کرتے ہوئے کہا کہ کیا اداکار پاگل ہیں؟ جو مداح کو مار رہے ہیں۔ایک مداح نے کہا کہ تصور کریں کہ اگر وہ مداح بھی پلٹ کر جیکی شروف کو تھپڑ مار دیتا تو کیا ہوتا، دیگر مداحوں نے کہا کہ یہ غلط ہے، آپ کسی کو نہیں مار سکتے، وہ آپ کا رشتہ دار یا دوست نہیں ہے جس کو تھپڑ مار کر آپ اسے مذاق مستی کا نام دے رہے ہیں۔
