اسمارٹ فون بنانے والی چینی کمپنی ویوو نے آئی فون اور سام سنگ جیسی ٹیکنالوجی سے لیس اپنا نیا فون ”ایکس 200“ پیش کردیا۔
”ویوو ایکس 200“ کو کمپنی نے ’سیو اور سول‘ (ایس او ایس) ایمرجنسی ٹیکسٹنگ ٹیکنالوجی کے ساتھ متعارف کرایا ہے اور پہلی بار کمپنی نے اپنے کسی فون میں یہ ٹیکنالوجی استعمال کی ہے۔
ایس او ایس ٹیکسٹنگ ٹیکنالوجی عام طور پر آئی فون اور سام سنگ کے فونز میں استعمال کی جاتی ہے، اس سروس کے تحت ایمرجنسی کی صورت میں صارف دوسرے صارف کو سگنل نہ ہونے کے باوجود میسیج بھیج سکتا ہے۔
کمپنی کے مطابق ویوو ایکس 200 کے صارفین سگنل نہ ہونے کی صورت میں ایک کلو میٹر کے فاصلے تک ایس او ایس ٹیکنالوجی کے تحت میسیج بھیج سکیں گے۔
کمپنی نے فون کو 7-6 انچ اسکرین جب کہ طاقتور 5800 ایم اے ایچ بیٹری اور 90 واٹ کے چارجر کے ساتھ پیش کیا ہے۔
ویوو ایکس 200 کو 12 اور 16 جی بی ریم جب کہ مختلف میموری ماڈیولز کے ساتھ متعارف کرایا گیا ہے۔
فون میں کمپنی نے اپنا اینڈرائیڈ سسٹم اوریجن او ایس 5 دیا ہے جب کہ فون میں فنگر پرنٹ سینسر سمیت دیگر سیکیورٹی فیچرز بھی دیے گئے ہیں۔
ویوو ایکس 200 کو تین بیک کیمروں جب کہ ایک سیلفی کیمرا کے ساتھ متعارف کرایا گیا ہے، تاہم کمپنی کا دعویٰ ہے کہ اس بار کیمروں کی ٹیکنالوجی کو انتہائی ایڈوانس کرنے کے ساتھ ساتھ اس میں آرٹیفیشل انٹیلی جنس (اے آئی) فیچرز بھی دیے گئے ہیں۔
فون کی قیمت ماڈیولز کے حساب سے مختلف رکھی گئی ہے، سب سے کم 12 جی بی ریم اور 256 جی بی میموری ماڈیول کی قیمت ایک لاکھ 16 ہزار روپے جب کہ سب سے زیادہ 16 جی بی ریم اور 512 جی بی میموری ماڈیول کی قیمت ڈیڑھ لاکھ روپے تک رکھی گئی ہے۔
فون کو ابتدائی طور پر محدود ممالک میں فروخت کے لیے پیش کیا گیا ہے، تاہم جلد ہی اسے دنیا بھر میں پیش کردیا جائے گا۔
