پشاور(ڈیلی پاکستان آن لائن )مشیر خزانہ خیبرپختونخوا مزمل اسلم نے کہا ہے کہ وفاق نے صوبے کے پیسے نہ دیے تو آئی ایم ایف سے سرپلس کا جو وعدہ کیا ہے ہم سے اس کی توقع بھی نہ رکھے۔
نجی ٹی وی جیونیوز سے گفتگو کرتے ہوئے مزمل اسلم نے کہا کہ اس سال وفاق سے ضم اضلاع کے لئے 400 ارب ملنے چاہئیں تھے لیکن اے آئی پی اور بجٹ کو ملا کر ہمارے لئے 70 ارب روپے رکھے گئے، 70 ارب میں سے اب ملیں گے کتنے؟ یہ30 جون 2025 کو ہمیں اپ ڈیٹ کریں گے۔مزمل اسلم نے کہا کہ کشمیر کےلئے وفاق نے بجٹ 50 فیصد اور گلگت کے لئے37 فیصد بڑھایا ہے جبکہ قبائلی اضلاع کا بجٹ صفر فیصد بھی نہیں بڑھایا، ہم نے وفاق کو واضح طور پر بتادیا ہے کہ آپ زیادتی کر رہے ہیں۔مشیر خزانہ کے پی نے کہا کہ وفاق کو آگاہ کر دیا ہے کہ تنخواہیں بڑھانے کے تناسب سے پیسے ملنے چاہئیں، وفاق نے کہا کہ اب تو آئی ایم ایف سے بات ہوگئی ہے، اگلے سال دیکھیں گے۔ انہوں نے کہا کہ وفاق نے پیسے نہ دیے تو آئی ایم ایف سے سرپلس کا جو وعدہ کیا ہے ہم سے وہ توقع نہ کرے، بجلی کاخالص منافع اور رائیلٹی کے واجبات نہ ملے تو سرپلس کو مینج کرنا مشکل ہوگا، 2 سال سے وفاق کی جانب سے واجبات کی ادائیگی سست روی کا شکار ہے۔
مزمل اسلم کا کہنا تھا آمدن کا تخمینہ پچھلے سال 70 ارب روپے اور اس سال 93 ارب روپے ہے، اب نیا این ایف سی آجانا چاہئے اور ہمیں نئے این ایف سی کے ساب سے شیئر ملنا چاہئے مگر وفاق نیا این ایف سی نہیں ہونے دے رہا۔
