(ویب ڈیسک) واٹس ایپ دنیا کا مقبول ترین میسجنگ پلیٹ فارم ہے جس میں 2024 کے دوران درجنوں نئے فیچرز کا اضافہ کیا گیا۔
درحقیقت میٹا کی ملکیت والی ایپ میں اتنے زیادہ نئے فیچرز شامل کیے گئے ہیں کہ بہت سے صارفین ان سے بے خبر ہیں یا انہوں نے ان پر زیادہ توجہ نہیں دی۔
اس بات کا اعتراف خود واٹس ایپ نے کیا کہ کئی نئے فیچرز ایسے ہیں جن کے بارے میں صارفین کو علم نہیں ہو سکا اسی لیے واٹس ایپ نے 2024 میں آنے والی اہم تبدیلیوں کا ذکر ایک خصوصی میمو میں کیا۔
برطانوی میڈیا کی رپورٹ کے مطابق واٹس ایپ کی جانب سے مرتب کی گئی فہرست میں سب سے اہم فیچر جو شامل کیا گیا وہ واٹس ایپ ویب پر کانٹیکٹس کو ایڈ کرنے کی سہولت ہے یعنی اب صارفین واٹس ایپ ویب پر بھی اپنے کانٹیکٹس کو منیج کر سکتے ہیں اور یہ سہولت دیگر ڈیوائسز میں بھی دستیاب ہے جو مرکزی اکاؤنٹ سے لنک ہوں۔
اس اپ گریڈ کی بدولت اب آپ کو کانٹیکٹس کو صرف واٹس ایپ پر ہی محفوظ کرنے کی اجازت ہے فون پر انہیں ایڈ کرنے کی ضرورت نہیں۔
اس کے علاوہ واٹس ایپ میں چیٹس کو منظم کرنے کے لیے کاسٹیوم لسٹس اور فیورٹس کا اضافہ کیا گیا ہے ایک اور اہم تبدیلی ایونٹس فیچر کا متعارف کرانا ہے جس کے ذریعے آپ دوستوں یا اہل خانہ کو کسی تقریب میں مدعو کرنے کے لیے ایونٹس ترتیب دے سکتے ہیں اور خودکار ریمائنڈرز بھی حاصل کر سکتے ہیں۔
2024 میں ویڈیو کالنگ بھی بہتر کی گئی ہے اور اب آپ 32 افراد کے ساتھ ویڈیو چیٹ کر سکتے ہیں ساتھ ہی متعدد فلٹرز اور بیک گراؤنڈز کی سہولت بھی موجود ہے۔
آڈیو کالنگ کے معیار کو بھی تیز انٹرنیٹ کنکشن پر خودکار طور پر بہتر کیا گیا ہے اور ویڈیو کالز کے لیے معیاری ریزولوشن بھی اس سال واٹس ایپ کا حصہ بن گیا ہے۔
میٹا کی ملکیت والی ایپ نے چینل کیٹیگریز متعارف کرائیں اور تصاویر کو اسٹیکرز میں تبدیل کرنے کی سہولت بھی فراہم کی۔
چینلز پر وائس اپ ڈیٹس اور 16 ایڈمنسٹریٹرز کی سپورٹ کا بھی اضافہ کیا گیا ہے اور اب آپ چینلز کی پوسٹس کو کسی چیٹ یا اسٹیٹس پر فارورڈ بھی کر سکتے ہیں۔
اگر آپ ان فیچرز سے واقف نہیں تھے تو اب آپ انہیں واٹس ایپ پر استعمال کر سکتے ہیں۔
یہ بھی پڑھیں:سائبرحملے کے بعد جاپان ایئر لائنز کا نظام بحال،فلائٹ آپریشن شروع
